Вĕренекенсем хушшинче районта иртекен патриотла сăвăсен конкурсĕн шкулти этапĕнче 5-9 – мĕш класс ачисем хастарлăх кăтартрĕç. Вăрçă паттăрĕсемпе çĕр çинчи мирлĕ пурнăçа халалласа вырăсла та чăвашла хайларĕç вĕсем хăйсен сăввисене. Чăвашла çырнă чи лайăх «Чапаев – герой» сăвва районти конкурса сĕннĕ. Ăна 9-мĕш классра вĕренекен Анатолий Гаврилов çырнă.

                          Чапаев – герой

Шупашкарта час-час пулатăп,

Курап мăнаçлă палăка.

Патне пырса алла сулатăп,

Салам калатăп паттăра.

Аса килет тахçан иртнийĕ-

Граждан вăрçийĕн çулĕсем.

Аçа çапса çиçĕм çиçнийĕ,

Пуç урлă вĕçнĕ пульăсем.

Çарсем пĕрне-пĕри тулланă-

Хĕрлисемпе шур салтаксем.

Урал таврашĕнче уланă

Хăватлă тупă сассисем.

Хĕрлисене вăрçа çĕкленĕ

Хăюллă паттăр, вăл – Чапай.

Çапăçăва пĕр шиксĕр кĕнĕ,

Çарне кăларнă вăл чапа.

Вăл Пушкăрт çĕр-шывне хăтарнă.

Вара Шупашкара килсен

Гранит юпа çине хăпарнă

Анмасăрах лаши çинчен.

Манмасть çĕр-шыв ăна  паян та,

Будайкăн паттăр ачине.

Сума суса кирек хăçан та

Мухтать пур халăх ун ятне.

                                  Гаврилов Анатолий

                                                                Элпуçĕнчи вăтам шкул, 9 класс